ရောဂါလက္ခဏာများနှင့်ပတ်သက်သောမေးခွန်းနှင့်အဖြေများ (6.8.21)

🚩🚩🚩1. Menstruation လာရမယ့်အချိန်မှာ covidပိုးဝင်သွားလို့ Menstruationမလာတော့တာ ဆိုင်လားရှင့်။  covidဝင်နေချိန် ဆေးသောက်ရတာများပြီး အသားရေပြောင်းလဲမှုရော ဖြစ်တတ်လားရှင့်။ 

 ဖြေ။ ရောဂါပိုးကူးစက်ခြင်း အပါအဝင် ခန္ဓာကိုယ်တွင် ကြီးမားသော Stress ဖိစီးမှုများ ဖြစ်ပွားသည့်အခါ ဟော်မုန်းဆိုင်ရာ ပြောင်းလဲမှုများ ဖြစ်ပေါ်တတ်ပြီး ဓမ္မတာ ရာသီသွေး အပြောင်းအလဲများ ဖြစ်ပေါ်တတ်ပါတယ်။ ကိုဗစ်ရောဂါကြောင့် အရေပြားဆိုင်ရာ လက္ခဏာများလည်း ခံစားရနိုင်ပါတယ်။ အောက်ပါလင့်ခ်တွင် ကျေးဇူးပြု၍ ဖတ်ပေးပါ။ https://www.facebook.com/ckcmohnugmm/posts/113571524328436 

🚩🚩🚩2. Day 21 နောက်ပိုင်းမှာရော အောက်ဆီဂျင်ကျတတ်ပါသလား။ Day 1 to 21 ထိ SpO2 က 99/98 ပါ။ 

 ဖြေ။ ရောဂါလက္ခဏာ ခံစားရမှုများမှာ တစ်ဦးနှင့်တစ်ဦး တူညီမှု မရှိပါ။ ရောဂါပြင်းထန်မှု ရှိမရှိမှာ ကိုယ်ခံအားအခြေအနေ၊ အခြားရောဂါများ ရှိမရှိ၊ ဗိုင်းရပ်စ်ပိုးမျိုးကွဲ၏ သဘောသဘာဝတို့တွင်လည်း မူတည်ပါတယ်။ ရောဂါပိုးကူးစက်ခံရသူ အများစုမှာ လက္ခဏာစတင်ခံစားရချိန်မှစ၍ ၁ ပတ်မှ ၂ ပတ်အတွင်း သက်သာသွားလေ့ရှိပါတယ်။ အချို့သူများမှာ ဒုတိယအပတ်မှစ၍ ပြင်းထန်သောရောဂါလက္ခဏာများကို ခံစားရလေ့ရှိပြီး အသက်အန္တရာယ်နှင့် ကြုံတွေ့ရနိုင်ပါတယ်။  အနည်းငယ်သောသူများမှာ ပြင်းထန်သော ရောဂါလက္ခဏာများကို ၃ ပတ်မှ ၆ ပတ်အထိ ခံစားရလေ့ရှိပြီး နောက်ဆက်တွဲဆိုးကျိုးများနှင့်လည်း ကြုံတွေ့ရနိုင်ပါတယ်။ အဆုတ်ထိခိုက်ခံရသူများ၊ နှလုံးထိခိုက်ခံရသူများနှင့် သွေးခဲခြင်း ပြဿနာရှိသူတို့တွင် သွေးတွင်းအောက်ဆီဂျင် ကျဆင်းမှုများနှင့်လည်း ကြုံတွေ့ရနိုင်ပါတယ်။

🚩🚩🚩3. ငှက်ဖျားနဲ့ ကိုဗစ်အတူတူဖြစ်နိုင်လားရှင်။ ကိုဗစ်ဖြစ်နေတုန်း ငှက်ဖျားပိုးဝင်နိုင်လားရှင်။ 

 ဖြေ။ ကိုဗစ်ရောဂါနှင့် ငှက်ဖျားရောဂါတို့ကို ဖြစ်စေနိုင်သော ရောဂါပိုးများနှင့် ရောဂါကူးစက်မှုကို ဖြစ်စေနိုင်သော နည်းလမ်းများမှာ ကွာခြားပါတယ်။ 

ကိုဗစ် ၁၉ ဟာ SARS-CoV-2ဗိုင်းရပ်စ်ကြောင့်ဖြစ်သော ရောဂါဖြစ်ပြီး ကိုဗစ်ရောဂါပိုးရှိသူမှ နှာချေ ချောင်းဆိုးခြင်း၊ ကျယ်လောင်စွာစကားပြောဆိုခြင်း၊ သီချင်းဆိုခြင်းတို့မှ ထွက်လာသော အမှုန်အမွှားများမှတစ်ဆင့် ကူးစက်နိုင်ပါတယ်။ လေ့လာတွေ့ရှိချက်များအရ ရောဂါပိုးရှိသူနှင့်အနီးကပ်ထိတွေ့ခြင်း ( နှစ်မီတာအတွင်း ) မှတဆင့်အဓိကကူးစက်နိုင်ပြီး ရောဂါပိုးပါသော အမှုန်အမွှားများကို ရှူမိခြင်း၊ ရောဂါပိုးရှိသောလက်ဖြင့် မျက်စိ၊နှာခေါင်းနှင့် ပါးစပ်တို့ကိုကိုင်မိခြင်းတို့မှတဆင့်လည်း ကူးစက်နိင်ပါတယ်။ ထို့အပြင် ရောဂါပိုးရှိနေနိုင်သော လေဝင်လေထွက်မကောင်းသောနေရာများ၊ လူထူထပ်သောအဆောက်အအုံများတွင် အချိန်ကြာမြင့်စွာနေထိုင်ခြင်းမှလည်း ကူးစက်နိုင်ပါတယ်။

ငှက်ဖျားရောဂါမှာမူ ငှက်ဖျားပိုး ပလက်စ်မိုးဒီးယမ်း (Plasmodium) ပါရာဆိုက်ကြောင့်ဖြစ်သော ရောဂါဖြစ်ပြီး ၎င်းကို သယ်ဆောင်သော အနောဖလိ (Anopheles) ခြင်ကိုက်ရာမှတဆင့် ရောဂါကူးစက်စေနိုင်ပါတယ်။ ရောဂါပိုးရှိသောသူကို ကိုက်ထားသောခြင်သည် ပလက်စမိုးဒီးယမ်း ရောဂါပိုးသယ်ဆောင်သူဖြစ်လာပြီး ၎င်းမှတဆင့် အခြားသူများကို ကိုက်ခြင်းဖြင့် ရောဂါကူးစက်စေပါတယ်။ 

အထက်ဖော်ပြပါ ရောဂါကူးစက်စေနိုင်သောအခြေအနေများတွင် ရှိပါက ကိုဗစ်ရောဂါနှင့် ငှက်ဖျားရောဂါတို့မှာ အတူတကွ ဖြစ်ပေါ်နိုင်ပါတယ်။ 

🚩🚩🚩4. ကိုဗစ်ဖြစ်ပီး  ၂၇ ရက်မြောက်ရှိပါပြီခင်ဗျ။ အနံ့ပျောက်ပြီး ပြန်ရကာစလိုမျိုး ပြန်ဖြစ်နေလို့ပါဗျ။ အနံ့သေချာမရလို့ပါ။ ဒုတိယအကြိမ်ပြန်ဖြစ်တာလားခင်ဗျ။ 

 ဖြေ။ ကိုဗစ်ရောဂါကြောင့် အနံ့ပျောက်ခြင်းမှာ နှာခေါင်းအတွင်းပိုင်းရှိ အနံ့ခံအာရုံကြောလေးများ ထိခိုက်ခြင်းကြောင့်ဖြစ်တတ်ပြီး အများအားဖြင့် ရက်အနည်းငယ်အတွင်း ပြန်လည်သက်သာလာလေ့ရှိသော်လည်း အချို့သူများတွင် လအနည်းငယ်အထိ ကြာမြင့်နိုင်ပါတယ်။ ကိုဗစ်-၁၉ရောဂါတွင် အနံ့ပျောက်ခြင်းနှင့် ပတ်သက်၍ အောက်ပါပို့စ် မှ မေးခွန်းနံပါတ် ၈ ၏ အဖြေကို ဖတ်ပေးပါ။ https://www.facebook.com/ckcmohnugmm/posts/116753554010233 

#CovidClinicalFeatures

#ckc #covid19_knowledge_centre

#nugmoh #covid19