ကိုဗစ်ကာကွယ်ခြင်းဆိုင်ရာမေးခွန်းများ (6.8.21)

#CovidAirTravel

=================================

🚩🚩🚩1. ကိုဗစ်ပိုးက အဆုတ်ကို ဖျက်ဆီးတယ်လို့ ကြားပါတယ်၊ အဆုတ်ကို ကာကွယ်ရန် အကောင်းဆုံး အစားအစာ အသီးအရွက်လေးတွေ ပြောပြပေးပါ ခင်ဗျ။

- အဆုတ်ကို ကာကွယ်တဲ့ အစားအစာရယ်လို့တော့ မရှိပါဘူး။ အဓိကအားဖြင့်တော့ အစာအာဟာရပြည့်ဝစေဖို့ သားငါးသီးရွက်ကို စုံလင်မျှတအောင် စားပေးပါ။

- အစာအာဟာရနှင့် ပတ်သက်၍ အောက်ပါ လမ်းညွှန်ချက်ကို ဖတ်ကြည့်စေလိုပါသည်။

https://www.facebook.com/MoHNUGMyanmar/posts/186140450212236 

- #အဆုတ်ကိုထိခိုက်စေမည့်အပြုအမူများဖြစ်သော

🚭 ဆေးလိပ်သောက်ခြင်း

❌ ကိုယ်တိုင်ဆေးလိပ်မသောက်သော်လည်း ဆေးလိပ်ငွေ့ရှူရှိုက်မိခြင်း (passive smoking)

🥃 အရက်သောက်ခြင်းတို့ကို ရှောင်ကြဥ်ပါ။ (အရက်သောက်ခြင်းက အသည်းလုပ်ဆောင်ချက်ကို အဓိက ထိခိုက်စေသော်လည်း ရေရှည်တွင် အဆုတ်ပါ ထိခိုက်နိုင်ကြောင်း တွေ့ရပါသည်)

🚩🚩🚩2. အဝတ်မတ်စ်တွေကို တစ်ခါသုံးပြီး အလုံအိတ်ထဲပိတ်ပြီး ဘယ်နှရက်ထားပြီး ပြန်သုံးရင် စိတ်ချရပါသလဲ? လူအများကြားထဲ မဟုတ်ဘဲ လမ်းသွားရင်းနဲ့ ရိုးရိုးမတ်စ်တစ်ခုပဲ တပ်ရင်ရော စိတ်ချရပါသလား ရှင်? ကျေးဇူးပါ၊ ပြည်သူ့ကျန်းမာရေးအဖွဲ့သားများ ဘေးအပေါင်းကင်း၍ ကျန်းမာကြပါစေ။

❌ အဝတ် mask များကို ထိုကဲ့သို့ အလုံပိတ်အိတ်ထဲ ထားပြီး ပြန်မသုံးရပါ။ ပိတ်စသားဖြစ်သည့်အတွက်ကြောင့် ထိုနည်းဖြင့် #လှည့်လည်သုံးခြင်းကအသုံးမဝင်ပါ။

- အဝတ် mask များကို အသုံးပြုပြီးတိုင်း လျှော်ဖွပ်ရပါမည်။ အနည်းဆုံးတော့ တစ်နေ့လျှင် တစ်ကြိမ်လျှော်သင့်ပါသည်။ အဝတ် mask လျှော်ဖွပ်ပုံကို အောက်ပါပိုစ့် မေးခွန်း ၁ တွင် ကြည့်ပါ။

https://www.facebook.com/ckcmohnugmm/posts/110839787934943 

- နေ့စဥ်လှုပ်ရှားသွားလာရာတွင် ခွဲစိတ်ခန်းသုံး ပါးစပ်နှင့်နှာခေါင်းစည်း (surgical mask) တစ်ခုပဲ တပ်လို့ ရပါတယ်။ အဝတ် mask တစ်ခုတည်း တပ်မယ်ဆိုလျှင်တော့ #အနည်းဆုံးအလွှာ_၃_လွှာဖြင့် ချုပ်ထားသော အဝတ် mask ဖြစ်မှသာ စိတ်ချရပါမည်။ အဝတ် mask တွင် ပါဝင်သော ပိတ်စအလွှာ ၃ လွှာအကြောင်းကို အောက်ပါပိုစ့် မေးခွန်း ၃ တွင် ဖတ်နိုင်ပါသည်။

https://www.facebook.com/ckcmohnugmm/posts/113377394347849

- အဝတ် mask အကြောင်း အခြားသိကောင်းစရာများကို အောက်ပါ လင့်ခ်တွင်လည်း ဖတ်နိုင်ပါသည်။

https://www.facebook.com/ckcmohnugmm/posts/113314311020824

🚩🚩🚩3. ပိုးသတ်ဆေးဖျန်းပြီး လက်သန့်ဆေးသုံးမိတဲ့ ဖြစ်စဥ်မှာ ပိုးသတ်ဆေး Chlorine နဲ့ လက်သန့်ဆေး ethanol ဓာတ်ပေါင်းမှုကြောင့် အဆိပ်ဖြစ်စေတယ်လို့ လူမှုကွန်ယက်တချို့မှာ တွေ့နေရတာ ရှိပါတယ်၊ ဒါဟာ အမှန်ပဲလားရှင့်?  ရှောင်ရှားသင့်တာလေးတွေ ပြောပြပေးစေလိုပါတယ် ရှင်။

❌ ကလိုရင်းပိုးသတ်ဆေးရည်ကို လူကို ဖျန်းခြင်း #မပြုလုပ်ရပါ၊ သက်မဲ့မျက်နှာပြင်များကို ပိုးသတ်ရန်သာ ဖြစ်ပါသည်။

- သက်မဲ့မျက်နှာပြင်များကို 0.1% ကလိုရင်းဆေးရည်ဖျန်းသည့်အခါတွင်တောင်မှ တစ်ကိုယ်ရည်သုံးအကာအကွယ်ပစ္စည်းများ ပြည့်ပြည့်စုံစုံသုံးပြီးမှသာ ဖျန်းရပါသည်။ ထို့ကြောင့် လူကို တိုက်ရိုက်ဖျန်းခြင်း (လုံးဝ) လုံးဝ မပြုရပါ။

- ထို့အတူ မည်သည့်ပိုးသတ်ဆေးရည်ကိုမှ လူခန္ဓာကိုယ်ပေါ်တိုက်ရိုက်ဖျန်းရန် ကျွမ်းကျင်ပညာရှင်များက #ညွှန်ကြားထားခြင်းမရှိပါ။ ထိုသို့ ဖျန်းခြင်းသည် မထိရောက်သည့်အပြင် #လူ့ကျန်းမာရေးထိခိုက်စေသောကြောင့် မပြုလုပ်ရပါ။

👉 လုပ်ရမည့် အချက်မှာ ရေနှင့်ဆပ်ပြာသုံးပြီး လက်ကို စနစ်တကျ အနည်းဆုံး စက္ကန့် (၂၀) ကြာအောင် မကြာခဏ ဆေးပါ။ ရေမရရှိနိုင်ပါက အနည်းဆုံး Alcohol (60%) ပါသည့် ရေမလိုလက်သန့်ဆေးရည်ကို အသုံးပြုပါ။

🚩🚩🚩4. "ကျွန်တော့်အဘွား အသက် ၈၁ နှစ်ရှိပါပြီ။ covid စဖြစ်ပြီး 24 ရက်အကြာ ဒီနေ့ test kit နဲ့ ထပ်စစ်တော့ negative ပြပါတယ် ခင်ဗျ။ အဲ့ဒါ ‌ရန်ကုန်ကနေ တောင်ကြီးကို လေယာဉ်နဲ့ ခေါ်လာမှာမို့ ဆောင်ရန်/ ရှောင်ရန်လေးတွေ သိချင်လို့ပါ။ ကိုဗစ်ဖြစ်ပြီးသားသူက လေယာဉ်နဲ့ ခရီးထွက်ရ/ မရပါ သိချင်လို့ပါ ခင်ဗျာ"

- ဤကိုဗစ်ကာလတွင်

🚨 လတ်တလော ဖျားနာ၊ ချောင်းဆိုးခြင်းနှင့် အခြား ကိုဗစ်လက္ခဏာ ရှိသူများ

🚨 မကြာသေးမီကမှ ကိုဗစ်ပိုးစစ်ဆေးရာမှ positive ဖြစ်သူများ

🚨 ကိုဗစ်ပိုးစစ်ဆေးခြင်းအဖြေကို စောင့်ဆိုင်းနေဆဲ ဖြစ်သူများ

🚨 လက်ရှိ ဘာလက္ခဏာမှ မရှိသော်လည်း ကိုဗစ်ပိုးစစ်ဆေးရာမှ positive ဖြစ်သူများ

🚨 ပိုးတွေ့အတည်ပြုလူနာနှင့် လွန်ခဲ့သည့် ၁၄ ရက်အတွင်း အနီးကပ်ရှိနေခဲ့သူများ ခရီးသွားခြင်း မပြုသင့်ပါ။

- ကိုဗစ်ဖြစ်ပြီးသားသူက သတ်မှတ်ထားသည့် သီးခြားခွဲနေရမယ့် ရက်လည်း ပြည့်မယ်၊ လက်ရှိ ဘာလက္ခဏာမှလည်း ရှိမနေဘူးဆိုလျှင်တော့ လေယာဥ်နဲ့ ခရီးထွက်လို့ ရပါတယ်။ သီးခြားခွဲနေရမည့် ရက်နှင့် ပတ်သက်၍ အောက်ပါပိုစ့် မေးခွန်း ၄ တွင် ကျေးဇူးပြု၍ ဖတ်ပေးပါ။

https://www.facebook.com/ckcmohnugmm/posts/121038820248373 

- ဤကာလတွင် လေယာဥ်နှင့် ခရီးသွားပါက အောက်ပါအချက်များကို လိုက်နာပေးပါ။

👉 မဖြစ်မနေ လိုအပ်မှသာ ခရီးသွားပါ

👉 ခရီးစဥ်မတိုင်ခင် ကိုဗစ်ကာကွယ်ဆေးထိုးထားနိုင်လျှင် ကောင်းပါသည်

👉 ခရီးစဥ်တစ်‌လျှောက်နှင့် လေဆိပ်တွင် ရှိနေစဥ်အတွင်း mask တပ်ထားရမည်

👉 အဆောက်အဦအတွင်းတွင် ဖြစ်စေ၊ လေယာဥ်တက်/ ဆင်းဖို့ တန်းစီ စောင့်ဆိုင်းနေစဥ် ဖြစ်စေ တစ်ဦးနှင့် တစ်ဦး အနည်းဆုံး ၆ ပေအကွာ နေရပါမည် (လေယာဥ်ခုံကပ်လျက် ထိုင်ရလျှင်မူ မစိုးရိမ်ပါနှင့်၊ လေယာဥ်ရှိ အဲကွန်းများသည် အတွင်းလေကို အပြင်သို့ စစ်ထုတ်နိုင်အောင် စီမံထားပါသည်)

👉 အိမ်သာအသုံးပြုဖို့ လူများနေပါက နေရာတွင်သာ စောင့်ဆိုင်းပြီး လူရှင်းမှသာ သွားသင့်ပါသည်၊ တန်းစီ စောင့်ဆိုင်းနေတာမျိုးကို တတ်နိုင်သမျှ ရှောင်ပေးပါ

👉 Alcohol 60% ပါသည့် ရေမလိုလက်သန့်ဆေးရည်ဘူး အသေးလေး (အများဆုံး 100 ml ပါဝင်သည့်ဘူး) ကို ကိုယ်နှင့်မကွာ ဆောင်သွားပါ

👉 ဘယ်မျက်နှာပြင်မဆို ထိကိုင်ပြီးတိုင်း လက်ကို ရေနှင့်ဆပ်ပြာ (သို့မဟုတ်) ရေမလိုလက်သန့်ဆေးရည်ဖြင့် မကြာခဏ ဆေးကြောပါ

👉 မိမိ မျက်စိ၊ နှာခေါင်း၊ ပါးစပ်တို့ကို လက်ဖြင့် မကိုင်မိစေရန် သတိထားရမည်

👉 နှာချေ/ ချောင်းဆိုးသည့်အခါ တစ်သျှူးစက္ကူ/ တံတောင်ကွေးဖြင့် ဖုံးအုပ်ပါ၊ အသုံးပြုပြီးသား တစ်ရှူးကို အမှိုက်အိတ်ထဲ စနစ်တကျ စွန့်ပစ်ပြီး လက်ဆေးဖို့ မမေ့ပါနှင့်

👉 လေယာဥ်ခရီးစဥ်အတွင်း ခြေထောက်သွေးကြောခဲခြင်းမှ ကာကွယ်ရန် ၁ နာရီကြာတိုင်း ၃ - ၄ မိနစ်ခန့် ခြေဖဝါးကို အပေါ်ကော့လိုက်/ အောက်ပြန်ဆန့်လိုက် ပြုလုပ်‌ပေးပါ၊ သွေးလည်ပတ်မှုကောင်းစေသည့် compression stocking လိုမျိုး ဝတ်ထားနိုင်လျှင် ပိုကောင်းပါသည်၊ ရေများများ သောက်ပါ၊ အိပ်ဆေး သောက်ခြင်းကို ရှောင်ကြဥ်ပါ

👉 လေယာဥ်မောင်/မယ်များမှ အခါအားလျော်စွာ ညွှန်ကြားသော အချက်များကို တိကျစွာ လိုက်နာရပါမည်

👉 ခရီးစဥ်အတွင်း နေထိုင်မကောင်းဖြစ်ပါက လေယာဥ်မောင်/မယ်များကို အကြောင်းကြားပါ

👉 မိမိသွားလိုသည့် ဒေသသို့ ရောက်လျှင် နေအိမ်အခန်းတစ်ခု၌ ၁၄ ရက် သီးခြားခွဲနေ စောင့်ကြည့်သင့်ပါသည်၊ ထိုအတွင်း နေထိုင်မကောင်းဖြစ်ပါက နီးစပ်ရာ ဆေးကုဌာနတွင် ဆေးကုသမှု ခံယူရပါမည်။

#CovidPrevention

#ckc #covid19_knowledge_centre

#nugmoh #covid19