ကိုဗစ်ရောဂါလက္ခဏာများနှင့်အထွေထွေမေးခွန်းများ (9-7-21)

ရောဂါလက္ခဏာများနှင့်ပတ်သက်သောမေးခွန်းနှင့်အဖြေများ 

=================================

🚩🚩🚩1. Covid လူနာများဟာ ရောဂါလက္ခဏာပြပြီး တစ်ပါတ်အတွင်းမှာ သက်သာခဲ့ရင်တောင် ဒုတိယအပါတ်မှာ (၈ ရက် မှ ၁၄ ရက်) SpO2 စပြီးကျလာတတ်တယ်ဆိုတာဟုတ်ပါသလား။

- ကိုဗစ်-၁၉ ရောဂါပိုးကူးစက်ခံရသူတိုင်းဟာ သွေးတွင်းအောက်ဆီဂျင်ကျတာကို မခံစားကြရပါ။

- လေ့လာတွေ့ရှိချက်တွေအရ

👉 ပိုးကူးစက်ခံရသူတွေရဲ့ ၈၀ ရာခိုင်နှုန်းခန့်ဟာ မပြင်းထန်တဲ့ ရောဂါလက္ခဏာတွေပြပြီး ပထမတစ်ပတ်ကျော်လွန်ပါက တဖြည်းဖြည်းနဲ့ သက်သာသွားတာကို တွေ့ရပါတယ်။

👉 ၁၅ ရာခိုင်နှုန်းခန့်သော ကူးစက်ခံရသူတွေကတော့ ရောဂါလက္ခဏာပြပြီး  ဒုတိယအပတ်မှ စပြီး ရောဂါလက္ခဏာများ ပိုမိုဆိုးရွားစွာ ခံစားရလေ့ရှိပြီး သွေးတွင်း အောက်ဆီဂျင် SPO2 92% အောက်ကို ကျလာလေ့ရှိကာ ကုသမှုခံယူရလေ့ရှိပါတယ်။

👉 ကျန်တဲ့ ၅ ရာခိုင်နှုန်းခန့်သော ကူးစက်ခံရသူတွေမှာတော့ ပိုမိုပြင်းထန်တဲ့ ရောဂါလက္ခဏာများခံစားရလေ့ရှိပြီး လေပြွန်ထဲသို့ အသက်ရှူပိုက်ထည့်သွင်းရသည့် ကုထုံးများဖြင့် ကုသမှု ခံယူရလေ့ရှိကာ အသက်အန္တရာယ်ကြုံတွေ့ရနိုင်ပါတယ်။

🚩🚩🚩2.   ကျွန်မအခုဖြစ်နေတာအနံ့ပျောက်နေပါတယ်။ ဘာစားစား အရသာတော့ရှိပါတယ်။ ဘာရှူရှူ ဘာအနံ့မှမရပါဘူး။ ကိုဗစ်စပြီလားတော့မသိဘူး။ ဘယ်မှအသွားလာမရှိပါဘူး။ တစ်ချက်လောက်ပြောပြပေးပါရှင်။ 

- ယခုအချိန်ကာလတွင် ကိုဗစ်-၁၉ ရောဂါ သံသယလက္ခဏာများ ခံစားရပါက ကိုဗစ်-၁၉ ရောဂါ ဖြစ်နိုင်သည်ဟု သတိထားကာ အထူးဂရုပြု နေထိုင်ကြရပါမည်။

👉 ကိုဗစ်-၁၉ ရောဂါပိုးသည် ဗိုင်းရပ်စ်ပိုးတစ်မျိုးဖြစ်ပြီး ရောဂါပိုးကူးစက်ခံထားရသူ နှာချေချောင်းဆိုးခြင်းမှ ထွက်ပေါ်လာသော အမှုန်အမွှားများမှတစ်ဆင့် အသက်ရှူလမ်းကြောင်းသို့ ဝင်ရောက်ပြီး ကူးစက်ခံရခြင်း ဖြစ်ပါသည်။

👉 ၎င်းအမှုန်အမွှားများသည် စားပွဲ၊ ထိုင်ခုံ၊ ကြမ်းပြင်၊ တံခါးလက်ကိုင် စသည့် မျက်နှာပြင်တို့တွင် တင်ကျန်နေနိုင်ပြီး ၎င်းတို့ကို ကိုင်တွယ်မိသော မသန့်ရှင်းသော လက်မှတစ်ဆင့် အသက်ရှူလမ်းကြောင်းသို့ ဝင်ရောက်ကာ ကူးစက်နိုင်ပါသည်။

👉 တစ်ခါတစ်ရံတွင် ရောဂါလက္ခဏာမပြသေးသော ရောဂါပိုး ကူးစက်ခံထားရသူမှလည်း အခြားသူများထံသို့ ကူးစက်ပျံ့နှံ့စေနိုင်ပါသည်။

- ထို့ကြောင့် ရောဂါကာကွယ်ရေး လမ်းညွှန်ချက်များဖြစ်သည့် မဖြစ်မနေ နှာခေါင်းပါးစပ်စည်း တပ်ခြင်း၊ ဆပ်ပြာနှင့်ရေ အသုံးပြု၍ စက္ကန့် ၂၀ ကြာလက်ဆေးခြင်း၊ လူစုလူဝေး ရှောင်ရှားခြင်းတို့ကို လုပ်ဆောင်ကြရပါမည်။ 

CovidClinicalFeatures

ကိုဗစ်အထွေထွေမေးခွန်းများ 

=================================

🚩🚩🚩1.  ကိုဗစ်ဖြစ်ဖူးပြီးသားသူတွေဟာ နောက်ထပ်အချိန်ဘယ်လောက်ကြာရင် ထပ်ဖြစ်နိုင်လဲဆိုတာ သိချင်လို့ပါ။

- လေ့လာချက်များအရ ကိုဗစ်ဖြစ်ပြီးပြန်လည်ကျန်းမာလာသူတစ်ယောက်တွင် ကိုယ်ခန္ဓာမှ ထုတ်သော ပဋိဇီဝပစ္စည်း (antibody) ကြောင့် အနည်းဆုံး ၃ - ၆ လအထိ နောက်တစ်ကြိမ် ကိုဗစ်ပြန်မဖြစ်အောင် ရောဂါကာကွယ်နိုင်စွမ်း ရှိသည်ဟု သိရပါသည်။ (ကိုဗစ်ဖြစ်ပြီးသူသည်လည်း mask တပ်၊ လက်ဆေး၊ ခပ်ခွာခွာနေရပါမည်၊ မိမိတွင် ရောဂါကာကွယ်နိုင်စွမ်းရှိသည်ဟူ၍ ပေါ့ဆ၍ မရပါ)

- ကိုဗစ်ဖြစ်ပြီးသူမှာ နောက်တစ်ကြိမ် ကိုဗစ်ထပ်ဖြစ်တာ ယခုအချိန်အထိ အတွေ့ရနည်းသော်လည်း ကိုဗစ်ရောဂါပိုးမျိုးစိတ်ကွဲများစွာ ပေါ်ပေါက်လာနေသောကြောင့် မတူသော ကိုဗစ်ပိုးမျိုးစိတ် ကူးစက်ခံရပါက နောက်တစ်ကြိမ် ကိုဗစ်ထပ်ဖြစ်နိုင်ပါသေးသည်။ လက်ရှိအချိန်ထိ သုတေသနများပြုကာ လေ့လာနေကြဆဲ ဖြစ်ပါသည်။

- ဒုတိယအကြိမ် ကိုဗစ်ထပ်မံကူးစက်ခံရသော လူနာများကိုလည်း ကမ္ဘာ့ဒေသများ (ဟောင်ကောင်၊ အမေရိကန်၊ နယ်သာလန်၊ ဘယ်လ်ဂျီယံ) တွင် တွေ့ရှိကြောင်း မှတ်တမ်းများအရ သိရပါသည်။

🚩🚩🚩2. Oxygen concentrator ဟာ 1-7L ဆိုရင် လုံလောက်ပါသလား? သို့မဟုတ် 10L အနည်းဆုံးဝယ်ထားသင့်ပါသလား? ဝယ်တဲ့အခါမှာ စက်တွေက Medical grade equipment ဖြစ်ဖို့အရေးကြီးပါသလား? ဈေးကွက်ထဲမှာ အလွယ်တကူဝယ်လို့ရနိုင်တဲ့ non-medical grade equipment နဲ့ ဆိုရင်ရော အဆင်ပြေနိုင်ပါသလား?

- Non-medical grade oxygen concentrator က oxygen concentration ကို 30% ကနေ 90% အထိ ပေးနိုင်ပါတယ်။ flow ကို 1 L/min ဖြင့်ပေးမှသာ oxygen concentration 90% ကိုရရှိမှာ ဖြစ်ပါတယ်။ flow တင်လေ oxygen concentration ကျလေ ဖြစ်မှာပါ။

- ထို့ကြောင့် oxygen ပမာဏ များများလိုသောလူနာတွင် medical grade oxygen concentrator ကို ပေးနိုင်မှသာ အ​ကောင်းဆုံးပါ။

Source - ကိုဗစ်-၁၉ ဗဟုသုတစင်တာ