ကိုဗစ်ကုသခြင်းဆိုင်ရာမေးခွန်းများ (27.7.21)

1.🚩🚩🚩 ကျန်တာကတော့မရှိတော့ဘူး စစ်ကြည့်တာ‌တော့ အဆုတ်မှာ virus ၀င်သွားလို့တော့ပြောတယ် Oxygen တော့ပေးထားရတယ် recovery ပြန်ဖြစ်ဖို့ဘယ်လောက်ကြာနိုင်လဲဗျ။ အသက်80ပါ။

2..🚩🚩🚩  Oxygen level ကျတာက ဘယ်လောက်ကြာမှပြန်ပီးပုံမှန်ပြန်ဖြစ်တာလဲသိချင်ပါတယ်။ ဆေးတိုက်ရတာပေါ်မူတည်လား လူနာရဲ့ကိုယ်ခံအားပေါ်မူတည်တာပါလား။

ဖြေ - အောက်စီဂျင်လိုအပ်သော ကိုဗစ်လူနာများတွင် ပြန်လည်ကောင်းမွန်သက်သာလာမည့်အချိန်သည် လူနာ၏ အခြေအနေပေါ်မူတည်၍ မတူညီပါ။

ကိုဗစ်ဖြစ်သောလူနာများတွင် အဆုတ်သည် ကိုဗစ်ပိုးကြောင့် အဆုတ်ရောင်နမိုးနီးယား ( COVID 19 Pneumonia ) ဖြစ်ခြင်း၊ ARDS ဖြစ်ခြင်း၊ သွေးတွင်းကိုဗစ်ပိုးပြန့်ခြင်းကြောင့် အတွင်းအင်္ဂါအစိတ်အပိုင်းများ ထိခိုက်ခြင်း ( Sepsis )၊ ဘတ်တီးရီးယားပိုးထပ်ဝင်ခြင်း တို့ကြောင့် အဆုတ်ထိခိုက်ခြင်းဖြစ်သည်။

ကိုဗစ်ကြောင့် အဆုတ်ထိခိုက်မှု ပြင်းထန်ခြင်း ရှိမရှိသည် အောက်ပါ အချက် ၃ ချက်ပေါ်မူတည်ပါသည်။

( ၁ ) #ရောဂါပြင်းထန်ခြင်းရှိမရှိ - ကိုဗစ်သိပ်မပြင်းထန်သော လူနာများတွင် အဆုတ်တစ်ရှူးများ၌ အမာရွတ် ကျန်နိုင်ခြေနည်းသည်။

( ၂ ) #လူနာ၏ကျန်းမာရေးအခြေအနေ - နာတာရှည်လေပြွန်ကျဉ်းရောဂါ ( COPD ) ရှိသူ၊ နှလုံးရောဂါရှိသူ၊ သွေးချိုဆီးချိုရောဂါရှိသူ၊ အသက်အရွယ်ကြီးရင့်သူ နှင့် အခြား ရောဂါအခံရှိသူတို့တွင် အဆုတ်ပိုမို ထိခိုက်နိုင်သည်။

( ၃ ) #အချိန်မီ မှန်ကန်သော ကုသမှုရရှိခြင်း စသည့်အချက်များပေါ်မူတည်ပါသည်။

3..🚩🚩🚩 စဖြစ်တဲ့ 7 ရက်အတွင်း favipiravir သောက်ရင် ပိုးတွေမပွါးအောင်လုပိပေးနိုင်တယိဆိုတာ ဟုတ်ပါသလားရှင့်

ဖြေ - Favipiravir ဆေးသည် ဂျပန်နိုင်ငံ၌ တုပ်ကွေးရောဂါကို ကုသရန် ၂၀၁၄ ခုနှစ်တွင် ဂျပန်နိုင်ငံ၊ Toyama Chemical မှထုတ်လုပ်သော ဆေးဖြစ်သည်။ ယခုအခါ ထိုဆေးကို ကိုဗစ်ရောဂါ ကုသရန် ဂျပန်၊ ရုရှား၊ အိန္ဒိယ နှင့် အချို့နိုင်ငံများတွင် စမ်းသပ်သုံးစွဲလျှက်ရှိသည်။ Favipiravir ဆေးဖြင့်ကုသရာတွင် ရောဂါလက္ခဏာ နှင့် ဓာတ်မှန်အခြေအနေများ၌ တိုးတက်မှုရှိသည်ဟုဆိုသော်လည်း ရောဂါကြောင့်သေဆုံးနိုင်ခြေလျှော့ချခြင်း နှင့် အောက်စီဂျင်လိုအပ်မှုနှုန်းတို့တွင် ကွဲပြားခြားနားခြင်းမရှိဟု ဆိုသည်။ Favipiravir ဆေးဖြင့် ကိုဗစ်ရောဂါကုသခြင်းအား ဆက်လက်လေ့လာနေကြဆဲဖြစ်သည်။

#CovidTreatment